GBB 2023

Evel boaz, digoret eo bet GBB gant An Taol-Lañs. C’hoariet o doa ar strolladoù war al leurenn diavaez, war blasenn kreiz-kêr Langoned. Rannet e oa an arzourien en daou rummad (“a-vicher” ha “dazont”). Pep sonadeg zo bet filmet hag adkaset war-eeun war radioù kevredigezhel lec’hel (RBG, RKB, Arvorig FM, Radio Naoned ha Radio Kerne) ha lusket eo bet an nozvezh gant hon daou animatour muiañ karet : Azenor Kallag ha Lors Jereg. Ur sapre daouad me lâr deoc’h ! 

Deuet eo ar maout gant strollad rap e brezhoneg Plouz & Foen er rummad a-vicher. C’hoariet o deus da c’houde, war leurennoù kevelerien al leurenn-lañs : Deus’ta 2023, ar FIL en Oriant e 2024, an Novomax e 2025 hag e vint e Bro Gembre er Festival tafwyl e miz Even 2025 ! 

D’an tu all, eo bet plijet ar juri gant Amelik er rummad “Dazont”.  Seniñ a ra Oud, ur benveg eus ar Reter, o kanañ pozioù nevez kompozet ganti e brezhoneg. Hec’h-unan war al leurenn d’ar vare-se, kavet he deus bremañ kompagnuned evit seniñ ganti e daou strollad  : Amelik ha Mouss eus un tu ha Milendal d’un tu all.

Sonadegoù liesseurt a zo bet war Leur Ñ GBB d’ar Sadorn! Garlonn, Kaolila, hag ar strollad euskareg Neomak o deus entannet al leurenn. Ur fest-noz 100% e vrezhoneg a zo bet goude, gant Eben, Dixit ha Modkozmik gant Annie Ebrel.

Abadennoù c’hoariva, gouren, ha sirk a zo bet a-hed an deiz. Aet ar maout gant ar c’hourenerien evit an tournamant Sam Poupon.

Echuet eo bet an devezh gant sonadeg elektro Quinquis ha sonadeg Krismenn e genlabour gant Shamoniks un DJ a Vro-Gembre.

D’ar Sul eo bet degemeret abadenn dibar Bugale Kreiz Breizh ha familhoù ar skolidi. Leun e oa al leurenn adalek 4egm! Da c’houde eo bet selaouet diouzh Nolwenn Korbell ha Gwilym Bowen Rhys o kanañ asambles e brezhoneg ha kembraeg.

D’ar memes koulz war an eil leurenn e oa ur fest-deiz 100% e kan-ha-diskan.

D’ar Sul ivez, filmoù ‘zo bet skignet a-hed an abardaez : “Me Kourjetenn” evit ar vugale, an teul-film “Re ar Menez”, 3 film-berr “Menez Are” hag ur c’hinnig filmoù-chakod.

Muioc’h c’hoazh a abadennoù d’ar sul evit ar familhoù.

Echuet eo bet an devezh war 3 sonadeg er leurenn Ꝃ : Madelyn Ann, Heptafonik ha Shamoniks